新一年買股票前,股票新手朋友停一停,諗一諗以下情況,如何保障自己投入的資金安全: 1.公司管理層的誠信和執行力決定了公司的業績成敗和日後的發展(向下還是向上)。不要相信甚麼計劃,一個執行力弱的公司,即使有千千萬萬嘅計劃,最後都係一個都做唔到。之後就會用藉口話世界經濟不景、行業發展收縮。千錯萬錯從來都不是管理層的錯,永遠都是社會的錯。咁你就要好小心。 2. 當業績長期倒退,股價拾級而下,即使公司每年的派息率都在8厘以上,表面的高派息,其實不能持續。股價跌咗,嗰間公司雖然減咗派息,但係表面上 派息率仍然高企。呢種有結構性問題的公司,就要特別小心。 3. 資金小,當然希望單天寶至尊,刀仔割大樹。但係分散風險的重要性,尤其那些業績不穩定、 長期虧損 的公司,絕對不應該押重注。重注只適合於龍頭、有強大業務護城河、強勁自由現金流,少負債,穩定增長的公司。呢種買入機會,當然唔會時時有,咁要睇你股市大平賣時,心臟夠唔夠強大,平時有冇做啱功課。一個好deal,絕對係眼光、果斷同運氣的結合。 4.政策風險帶來極大不確定性,例如內房這幾年,被往死裏打。政策令內房難以生存。你就要思考究竟政策改變,係短期影響,定係影響成個生態。 買股機會時時有,但做錯決定,唔係單係錢的問題,仲可能係自己選股及買賣時機的問題,最怕係影響日後買股的信心。見到大平賣時,不敢出手,等到大旺市,諗完又諗後,在高位時先入市,最後又讓自己後悔。 預祝大家2023年選到合心水靚股,獲得理想回報。